Björgvin EA seldur og var kvaddur í vikunni
Ísfisktogari Samherja, Björgvin EA 311, lagði af stað frá Dalvík til Vigo á Spáni um miðjan fimmtudag og kvöddu margir bæjarbúar þetta fengsæla skip og fylgdust með þegar landfestum var sleppt í síðasta sinn, í heimahöfn skipsins.
Nokkrir í áhöfn Björgvins EA taka þátt í siglingunni til Vigo, ásamt tveimur Spánverjum. Skipstjóri á siglingunni er Björn Már Björnsson og fyrsti stýrimaður er Brynjólfur Oddsson.
Félagarnir Leifur Björnsson og Hartmann Kristjánsson sáu um að sleppa, en þeir voru báðir í áhöfn Björgvins EA í liðlega tuttugu ár.
Björgvin EA var elsta skipið í flota Samherja, smíðað í Noregi árið 1988 og hefur alla tíð reynst mjög vel, að því er segir á vef fyrirtækisins. Þar segir að áhöfnin hafi umgengist skipið á sérstaklega vandaðan hátt og viðhald hafi alla tíð verið með ágætum.
Meðfylgjandi eru myndir sem teknar voru í blíðunni á fimmtudaginn.
Kristján Vilhelmsson framkvæmdastjóri útgerðarsviðs Samherja og Björn Már Björnsson skipstjóri.
Verðlaunagripir sem áhöfn Björgvins hafði unnið verða geymdir á góðum stað í framtíðinni. Jóhannes Árnason og Björn Már Björnsson sáu til þess.
Björgvin EA og vinnsluhús Samherja á Dalvík.
