40 ár síðan Akureyrin kom úr fyrsta túrnum
Nákvæmlega fjörutíu ár eru í dag liðin frá því frystitogarinn Akureyrin EA 10, fyrsta skip Samherja, kom úr sinni fyrstu veiðiferð, 23. desember 1983. Þetta er rifjað upp á heimasíðu fyrirtækisins í morgun og birtar stórskemmtilegar myndir úr túrnum.
Frændurnir Kristján Vilhelmsson, Þorsteinn Már Baldvinsson og Þorsteinn Vilhelmsson höfðu fyrr á árinu keypt nær allt hlutafé Samherja hf. í Grindavík, sem gerði út togarann Guðstein GK 140 og fluttu þeir frændur starfsemina til Akureyrar.
Guðsteinn GK kom til nýrrar heimahafnar 1. maí 1983 og var nafni skipsins breytt í Akureyrin EA 10.
„Um sumarið og fram á haust var unnið hörðum höndum við breytingar og endurbætur á skipinu í Slippstöðinni á Akureyri. Akureyrin fór í prufutúr í lok nóvember og í desember var farin fyrsta veiðiferðin. Skipið kom til Akureyrar á Þorláksmessu, 23 desember, vegna jólafrís skipverja,“ segir á vef Samherja.
Síðan segir: „Samherji hefur vaxið og dafnað á þessum fjörutíu árum og nú landa nokkur skip félagsins í viku hverri, enda vinnsluhús félagsins afkastamikil.
Í skjalasafni Samherja eru varðveitt skjöl er tilheyra fyrstu veiðiferðinni, svo sem tilkynning til bæjarfógetans á Akureyri um áhöfn skipsins og uppgjör vegna veiðiferðarinnar. Hásetahluturinn var kr. 34.935,67 auk orlofs kr. 3.556,96. 23.desember, Þorláksmessa, er því einn af mörgum merkisdögum í sögu Samherja.“
Akureyrin nýskveruð og fín í reynslusiglingu á Eyjafirði eftir breytingar í Slippstöðinni. Skipið hélt svo á veiðar í prufutúr þann 24. nóvember 1983.
Þorsteinn Vilhelmsson skipstjóri með ryksuguna á lofti á landstími. Efst fyrir miðju er lítill sjónvarpsskjár sem sýndi svart/hvíta mynd af gangi mála á millidekkinu. Strákarnir voru í fyrstu ekki of hrifnir af þessum skjá og kölluðu hann Stöð 2. Samnefnd sjónvarpsstöð var ekki til á þessum árum.
Smellið hér til að sjá fleiri myndir úr fyrsta túr Akureyrarinnar EA 10
