Góðgerðargolf í Skógarböðunum!
Ertu kylfingur og vilt e.t.v. slá tvær flugur í einu höggi? Óvenjulegt tækifæri gefst til þess í vikunni.
Finnur Aðalbjörnsson verktaki og eigandi Skógarbaðanna tók sig til ásamt sínu fólki í vikunni og útbjó litla eyju í vatninu neðan við böðin. Segja má að eyjan sé hluti af nýstárlegri golfbraut – tímabundinni braut vegna Arctic Open, hins árlega miðnæturmóts Golfklúbbs Akureyrar (GA) sem verður í vikunni.
Í tilefni mótsins, sem stendur frá næsta fimmtudegi til laugardags, ætla Skógarböðin og GA að bjóða upp á góðgerðargolfhögg í Skógarböðunum. Hægt verður að slá golfkúlu frá inngangi Skógarbaðanna niður á flöt á áðurnefndri eyju og greiða fyrir.
- 1 högg kostar 1.000 kr.
- 3 högg kosta 2.000 kr.
- 5 högg kosta 3.000 kr. eða upphæð að eigin vali.
Féð sem safnast rennur allt til einhvers góðs málefnis.
Finnur og hans menn unnu að því í nokkra daga að móta eyjuna, mokuðu upp sandi úr vatninu, sem tók drjúgan tíma. Þegar eyjan var orðin þétt og fín var hún þökulögð. Verkinu lauk í gær.
Eyjan í vatninu steinsnar neðan við Skógarböðin.
Horft af eyjunni - golflötinni - upp að Skógarböðunum þaðan sem slegið verður.
Fjórmenningarnir voru að ljúka við að tyrfa eyjuna – flöt „golfbrautarinnar“ – þegar Akureyri.net leit við í gær. Frá vinstri: Unnar Rúnarsson, Tómas Árnason, Finnur Aðalbjörnsson og Kolbeinn Þór Finnsson.
Við Skógarböðin í dag. Búið að ganga endanlega frá eyjunni með því að leggja möl allan hringinn.
Að neðan eru myndir teknar á meðan framkvæmdir stóðu sem hæst.
