Flugi til Düsseldorf frestað um eitt ár

Nice Air hefur frestað áformum um beint flug milli Akureyrar og Düsseldorf í Þýskalandi, en ætlunin var að hefja flug á milli þessara staða frá byrjun maí á þessu ári. Þessum áformum hefur nú verið frestað um ár. Ástæðurnar eru tvíþættar. Annars vegar hefur eftirspurnin hér norðan heiða verið dræm og hin hliðin er svo að Akureyri og Norðurland hafa einfaldlega ekki upp á nægilega mörg gistirými að bjóða til að mögulegt sé að hefja sölu á ferðum hingað frá Düsseldorf.

Þetta staðfesti Þorvaldur Lúðvík Sigurjónsson, forstjóri Nice Air, í samtali við Akureyri.net. „Við erum búin að fresta því í ár,“ segir Þorvaldur Lúðvík. „Ástæðan er fyrst og fremst sú að okkar endursöluaðilar í Þýskalandi fá ekki hótelrými á Akureyri og Norðurlandi. Til þessa flugs var stofnað til að koma Þjóðverjum til landsins. Þeir vilja koma á Norðurlandið, en þeir verða að geta gist einhvers staðar.“

Flugfélagið þarf að sjálfsögðu á farþegum að halda báðar leiðirnar og í frétt hér á Akureyri.net þann 3. nóvember 2022 var haft eftir Helga Eysteinssyni, sölu- og markaðsstjóra Niceair, að flugið til Düsseldorf væri fyrst og fremst hugsað til þess að koma til móts við erlenda markaðinn, „en við treystum því auðvitað að fá stuðning við flugið til Düsseldorf frá innlenda markaðnum,“ sagði hann einnig. Sá stuðningur virðist vera takmarkaður því í samtali við Þorvald Lúðvík í dag kom fram að dræm viðbrögð hér ættu sinn þátt í því að þessum áformum hefur verið slegið á frest.