Ná Þórsarar að stöðva ÍR-inga í kvöld?

Þórsarar sækja ÍR-inga heim í kvöld í undanúrslitum úrslitakeppni 1. deildar karla í körfubolta. Þetta er þriðji leikurinn í einvíginu og nú er að duga eða drepast fyrir Þórsara; stefið sigur eða sumarfrí á við eins og hjá fleiri akureyrskum íþróttaliðum undanfarið. ÍR-ingar hafa unnið tvo fyrstu leikina þannig að Þórsarar verða að vinna í kvöld til þess að eiga möguleika á sæti í efstu deild. Tapi þeir eru Þórsarar komnir í sumarfrí en ÍR-ingar halda áfram keppni.

Leikur liðanna fer fram í Íþróttamiðstöð ÍR við Skógarsel í Breiðholti og hefst kl. 19:30.

ÍR-ingar unnu fyrsta leikinn nokkuð örugglega á heimavelli en Þórsarar veittu þeim mikla keppni í Höllinni á sunnudaginn. Spennan var gríðarleg þegar aðeins ein og hálf mínúta var eftir, ÍR-ingar þá einu stigi yfir en heilladísirnar gengu í lið með gestunum í blálokin og þeir gerðu 10 síðustu stigin.

Við ramman reip verður vissulega að draga í kvöld, ÍR-ingar eru töluvert betri á pappírnum en spennandi verður að sjá hvort Þórsstrákarnir nái að veita þeim verðuga keppni á ný. Vonandi fjölmenna Þórsarar á höfuðborgarsvæðinu í Skógarselið og styðja við bakið á sínum mönnum.