Valsarar héldu sínu striki og unnu KA-menn

Íslands- og bikarmeistarar Vals unnu KA 36:32 í KA-heimilinu í kvöld í Olísdeildinni í handbolta, efstu deild Íslandsmótsins. Valsmenn eru lang efstir í deildinni en KA er sem fyrr í 10. sæti með 11 stig. Átta efstu liðin komast í úrslitakeppnina.

Fyrri hálfleikurinn var jafn og skemmtilegur og staðan 17:17 að honum loknum. Snemma í seinni hálfleik gerðu Valsmenn svo fimm mörk í röð og lögðu þar með grunninn að öruggum og sanngjörnum sigri; þeir komust mest sex mörkum yfir og KA komst ekki nær þeim en þremur mörkum.

Valsmenn eru einfaldlega ógnarsterkir. Þeir léku afar góða vörn í seinni hálfleik og sóknin er yfirleitt létt og leikandi. Því var hins vegar öfugt farið hjá KA, eftir góðan fyrri hálfleik. Í þeim seinni opnaðist vörnin oft illa og KA-strákarnir lentu í vandræðum í sókninni vegna öflugum gestum sínum.

Mörk KA: Ólafur Gústafsson 9, Einar Rafn Eiðsson 8 (3 víti), Gauti Gunnarsson 7, Dagur Gautason 2, Allan Nordberg 2, Dagur Árni Heimisson 1, Jens Bragi Bergþórsson 1, Arnór Ísak Haddsson 1, Skarphéðinn Ívar Einarsson 1.

Varin skot: Bruno Bernat 3 (14,8%), Nicholas Satchwell 2 (14,2%)

Smellið hér til að sjá alla tölfræðina

KA er í 10. sæti með 11 stig, sem fyrr segir. Sjö umferðir eru eftir og næstu lið fyrir ofan, Haukar og ÍBV, eru með 14 stig.