Þriðji sigurleikur KA/Þórs í röð í deildinni
Leikmenn handboltaliðs KA/Þórs fögnuðu þriðja sigrinum í röð þegar liðið vann HK af miklu öryggi í dag, 25:17, í KA-heimilinu. Þetta var fyrsti heimaleikur Stelpnanna okkar á nýju ári í Olís deildinni, efstu deild Íslandsmótsins, en um síðustu helgi unnu þær Selfyssinga á útivelli.
Gestirnir voru aðeins hressari í byrjun og gerðu tvö fyrstu mörkin en heimamenn tóku síðan öll völd. KA/Þór náði mest níu marka forystu í leiknum og tölurnar segja allt sem segja þarf. Yfirburðirnir voru algjörir.
Rut Arnfjörð Jónsdóttir lék vel í sókninni að vanda og var markahæst, Matea Lonac var frábær í markinu og nýi leikmaðurinn, hin danska Ida Margrethe Rasmussen lofar góðu.
KA/Þór er nú fimmta sæti deildarinnar með 10 stig að loknum 12 leikjum, tveimur meira en Haukar.
Mörk KA/Þórs: Rut Arnfjörð Jónsdóttir 7 (4 víti), Nathalia Soares Baliana 5, Júlía Björnsdóttir 3, Hildur Lilja Jónsdóttir 3, Unnur Ómarsdóttir 3, Ida Margrethe Rasmussen 2, Lydía Gunnþórsdóttir 1 (víti), Anna Þyrí Halldórsdóttir 1.
Smellið hér til að sjá alla tölfræðina úr leiknum
Smellið hér til að sjá stöðuna í deildinni
