KA tekur á móti toppliði Breiðabliks í dag
Fyrsti leikur KA síðan markakóngurinn Nökkvi Þeyr Þórisson var seldur til Belgíu fer fram í dag þegar liðið tekur á móti Breiðabliki í Bestu deildinni, efstu deild Íslandsmótsins í knattspyrnu.
Fróðlegt verður að sjá hvaða áhrif brotthvarf Nökkva hefur á KA-liðið. Hann var í miklum ham í sumar og hefur gert 17 af 45 mörkum liðsins í deildinni.
Breiðablik er í efsta sæti og ljóst að liðið verður þar að loknum hefðbundnum 22 umferðum en KA er í harðri baráttu við Víking um 2. sætið. Næst síðasta umferð hefðbundinnar deildarkeppni er á dagskrá í dag, sú síðasta verður um næstu helgi og að henni lokinni verður fimm leikja „framlenging“ – einföld umferð sex efstu liða, þar sem efri þrjú liðin fá þrjá heimaleiki en tvo á útivelli og öfugt. Liðin halda stigum úr leikjunum 22 og að loknum fimm til viðbótar verður ljóst hverjir fagna Íslandsmeistaratitli og hverjir komast í Evrópukeppni á næsta ári.
KA getur mest náð 43 stigum, með því að vinna Breiðablik í dag og Val í Reykjavík um næstu helgi. Tapist báðir leikirnir hins vegar gæti KA endaði í fjórða sæti ef Valur vinnur Leikni í dag og KA í síðustu umferðinni.
Leikurinn í dag fer fram á nýja Greifavellinum í KA-svæðinu.
Allir leikir dagsins hefjast klukkan 14.00:
- Keflavík – Víkingur
- FH – ÍA
- Leiknir – Valur
- KA – Breiðablik
- KR – Stjarnan
- ÍBV – Fram
Staða sex efstu liða er þessi þegar 20 leikjum er lokið:
- Breiðablik 48 stig
- Víkingur 39 stig
- KA 37 stig
- Valur 32 stig
- Stjarnan 28 stig
- KR 27 stig
Síðasta umferðin í hefðbundnu deildarkeppninni verður um næstu helgi, laugardaginn 17. september klukkan 14.00:
- Breiðablik – ÍBV
- Fram – keflavík
- Stjarnan – FH
- Valur – KA
- ÍA – Leiknir
- Víkingur – KR
