KA semur við 29 ára miðvörð frá Slóveníu

Knattspyrnudeild KA hefur hefur samið við 29 ára slóvenskan miðvörð, Gaber Dobrovoljc, til loka keppnistímabilsins. Hann kemur til KA frá liði NK Domžale í Slóveníu.

„Það var ljóst að KA liðið þurfti á nýjum leikmanni að halda eftir að lánssamningur við Oleksiy Bykov rann út og erum við afar spennt fyrir því að fá Gaber til liðs við okkur,“ segir á heimasíðu KA í morgun.

„Gaber kemur úr unglingastarfi NK Domžale og hefur leikið allan sinn feril með liðinu fyrir utan eitt ár með Fatih Karagümrük í Tyrklandi. Með Domžale varð Gaber slóvenskur bikarmeistari árið 2017 og lék auk þess 25 Evrópuleiki með liðinu. Á sínum tíma lék Gaber 27 leiki fyrir yngri landslið Slóveníu sem og tvo leiki fyrir B-landslið.“

KA er í 3. sæti Bestu deildarinnar, efstu deildar Íslandsmótsins, með 27 stig eftir 14 leiki og er komið í 8-liða úrslit bikarkeppni KSÍ, Mjólkurbikarsins, þar sem KA-menn taka á móti Ægi 10. ágúst.