Ingimar Stöle semur við KA til hausts 2025

Ingimar Torbjörnsson Stöle hefur framlengt samning sinn við knattspyrnudeild KA og er nú samningsbundinn út sumarið 2025. Ingimar, sem er 19 ára gamall, kom til KA frá norska liðinu Víking í Stavangri í janúar í fyrra, og lék mjög vel síðari hluta sumars eftir að hann vann sér fast sæti í liðinu. Hann var í haust valinn efnilegasti leikmaður KA í sumar.

Ingimar hafði búið í Noregi alla tíð þar til hann kom til KA en á tvo leiki að baki með U19 landsliði Íslands. Á sinni fyrstu leiktíð með KA lék Ingimar 23 leiki, þar á meðal þrjá í Evrópukeppninni.