Hjálmur Jóhanns Helga „sigursæll“ með Þór/KA
Margrét Árnadóttir, leikmaður Þórs/KA lék með hjálm í gærkvöldi þegar liðið vann Þrótt 1:0 í Bestu deildinni, efstu deild Íslandsmótsins í knattspyrnu. Hún fékk höfuðhögg á móti Aftureldingu um daginn og missti af síðasta leik, gegn Selfossi.
Hjálmurinn er nokkuð þekktur norðan heiða eins og mbl.is vakti athygli á eftir leikinn, en hann er í eigu Jóhanns Helga Hannessonar fyrrverandi leikmanns karlaliðs Þórs. Jóhann notaði hjálminn um nokkurt skeið vegna tíðra höfuðmeiðsla á ferlinum.
Fyrr í sumar lék Andrea Mist Pálsdóttir, samherji Margrétar, með hjálminn umtalaða eftir að hún hafði fengið höfuðhögg. Hjálmurinn hefur því tekið þátt í tveimur leikjum, ef svo má segja, og unnið þá báða! Annar þjálfara Þórs gantaðist með það eftir leikinn í gær að hann myndi neyða einhvern leikmanna sinna til þess að bera hjálminn í næstu leikjum.
Smellið hér til að lesa frétt mbl.is
