Halldór Stefán tekur við KA-liðinu

Handknattleiksdeild KA hefur ráðið Halldór Stefán Haraldsson þjálfara meistaraflokks karla til þriggja ára frá og með næsta sumri. Hann tekur við liðinu af Jónatan Magnússyni sem tilkynnti fyrr í vetur að hann hygðist róa á ný mið. Greint var frá þessu á heimasíðu KA í kvöld. Hann þjálfar nú kvennalið Volda í Noregi og hefur gert í nokkur ár.

„Halldór Stefán sem er aðeins 32 ára fór snemma út í þjálfun og kominn með mikla reynslu þrátt fyrir ungan aldur,“ segir á heimasíðu KA. „Hann stýrði meðal annars kvennaliði Fylkis árin 2011-2016 og á sama tíma stýrði hann yngri landsliði kvenna fædd 1998 og 1999 á árunum 2012-2015. Hann var í kjölfarið ráðinn aðalþjálfari liðs Volda í Noregi þar sem hann hefur þjálfað frá 2016 en hann lætur nú staðar numið þar og kemur norður í sumar.“

Einnig afreksþjálfari

Á KA-síðunni segir ennfremur: „Volda hefur náð frábærum árangri undir stjórn Halldórs en hann hefur komið liðinu úr C-deild upp í norsku úrvalsdeildina. Eins og áður segir er Halldór Stefán ungur, efnilegur og spennandi þjálfari sem KA byggir miklar vonir við að haldi áfram því flotta starfi sem hefur verið unnið hjá félaginu. Halldór er einnig ráðinn sem afreksþjálfari hjá KA og er honum ætlað að koma enn meiri metnaði í afreksþjálfun fyrir yngri iðkendur hjá handknattleiksdeild KA. Einnig mun hann vera til aðstoðar og ráðlegginga við þjálfun á ungmennaliði sem og liði 3. flokks karla.

Halldór Stefán er með Master Coach gráðu sem og Master Coach Pro réttindi frá EHF síðan 2020. Árið 2015 kláraði hann IHF Top Handball og EHF Youth þjálfararéttindi síðan 2012. Þá er hann með B.Sc í Sport Science frá Háskólanum í Reykjavík sem hann kláraði árið 2013.“