Evrópukeppnin: KA fer til Wales
KA-menn drógust gegn liði Connah's Quay Nomads frá Wales í fyrstu umferð forkeppni Sambandsdeildar Evrópukeppninnar í knattspyrnu. Dregið var í höfuðstöðvum Knattspyrnusambands Evrópu, UEFA, í Nyon í Sviss rétt í þessu.
Fyrri leikur KA og Connah's Quay Nomads verður fimmtudaginn 13. júlí á Framvellinum í Úlfarsárdal í Reykjavík og sá síðari fimmtudaginn 20. júlí ytra.
Lið Nomads er frá bænum Connah's Quay nyrst í Wales, skammt sunnan við Liverpool. Heimavöllur félagsins stenst reyndar ekki kröfur UEFA svo hvorugur heimaleikurinn í þessari rimmu fer fram á heimavelli félaganna. KA fer því ekki til Wales – þótt svo segi í fyrirsögninni! – heldur mætast liðin í bænum Oswestry í Englandi, að því er segir á Facebook síðu KA. Oswestry er rétt handan landamæranna.
