Íshokkí

Mjög á brattann að sækja hjá meisturunum

Skapti Hallgrímsson - skapti@akureyri.net 21.03.2023 kl. 22:35

Jakob Jóhannesson markvörður SA einbeittur á svip á svellinu í kvöld. Hann lék mjög vel; hélt liðinu hreinlega á floti á tímabili. Ljósmynd: Skapti Hallgrímsson

Íslands- og deildarmeistarar Skautafélags Akureyrar voru skotnir hressilega niður á jörðina í kvöld í fyrsta úrslitaleiknum um Íslandsmeistaratitilinn í íshokkí. Leikmenn Skautafélags Reykjavíkur gerðu sér lítið fyrir og sigruðu SA Víkinga 7:3 í Skautahöllinni á Akureyri.

Strákarnir okkar í SA byrjuðu reyndar vel en svo tóku gestirnir smám saman völdin. Akureyringarnir voru ekki sjálfum sér líkir á alltof löngum köflum, náðu reyndar að hrista vel af sér slenið framan af þriðja leikhluta en það dugði þó ekki til. Í lokin freistuðu Akureyringar þess að brjóta SR-inga á bak aftur með fleiri sóknarmönnum en venjulega og tóku Jakob markmann af velli en það gekk ekki upp og gestirnir skoruðu tvívegis í tómt markið.

Mörkin:

1:0 Halldór Skúlason (12:23)
1:1 Jonathan Outma (15:35)
2:1 Unnar Rúnarsson (16:26)
2:2 Bjarki Jóhannesson (18:44)
_ _ _
2:3 Kári Arnarsson (28:04)
_ _ _
2:4 Þorgils Eggertsson (41:44)
2:5 Níels Hafsteinsson (48:16)
3:5 Hafþór Sigrúnarson (48:47)
3:6 Kári Arnarsson (58:22)
3:7 Styrmir Maack (58:43)

SR-ingar komu fullir sjálfstrausts til leiks og sigur þeirra var sanngjarn. Markvörður þeirra, Atli Valdimarsson, var frábær í kvöld og kom í veg fyrir að heimamenn næðu að ógna sigrinum af alvöru þegar þeir bitu í skjaldarrendur í lokahlutanum.

Næsti úrslitaleikur verður á heimavelli SR í Skautahöllinni í Laugardal á fimmtudaginn kl. 19.45. Þriðji leikurinn verður svo á Akureyri næstkomandi sunnudag kl. 16.45.

Þrjá sigra þarf til að verða Íslandsmeistari. Liðin þurfa því vonandi að leika oftar en þrisvar!