Kvenna- og karlalið SA hefja leik í dag

Íslandsmótið í íshokki karla og kvenna hófst fyrir nokkrum dögum, en Akureyrarliðin hefja leik í dag. Bæði lið SA mæta liðum Fjölnis í Egilshöllinni.

Sú breyting hefur verið gerð á leikjafyrirkomulagi á Íslandsmótinu að mun oftar en áður verða svokallaðir tvíhöfðar, það er að bæði lið hvers félags mæta sömu andstæðingum á sama degi. Þannig verða fleiri heimaleikir liða Skautafélags Akureyrar á laugardögum en verið hefur, en færri í miðri viku. Fyrstu heimaleikir beggja liða SA verða laugardaginn 28. september þegar bæði lið SR koma norður.

Í frétt á vef Skautafélagsins kemur fram að Kanadamaðurinn Sheldon Reasbeck, nýr þjálfari karla- og kvennaliðs SA, hafi unnið að því hörðum höndum á undanförnum dögum að koma sínu handbragði á liðin. Hann hefur þó aðeins haft tvær vikur með liðunum til þessa og áherslubreytingar verði því eflaust áþreifanlegri eftir því sem líður á tímabilið. Atli Þór Sveinsson verður áfram í þjálfarateymi kvennaliðsins, en hann þykir hafa sannað sig vel í því starfi og einbeitir sér áfram að varnarmönnum liðsins. 

Kvennadeildin jafnari en áður?

Búast má við jafnara móti í Hertz-deild kvenna nú en undanfarin ár. Til að mynda gengu þrjár sterkar hokkíkonur til liðs við Skautafélag Reykjavíkur fyrir tímabilið, allar upphaflega úr röðum SA. Fyrirliði SA, Ragnhildur Kjartansdóttir, fer í Laugardaglinn. Það gera einnig þær Inga Rakel Aradóttir, sem spilaði í Danmörku á síðasta tímabili, og Gunnborg Petra Jóhannsdóttir, sem spilaði í Svíþjóð. Nokkrar af öflugustu hokkíkonunum í Fjölni koma einnig að norðan og áttu stóran þátt í að ná titlinum af SA í vor. Það má því búast við því að lykilleikmenn beggja sunnanliðanna, Fjölnis og SR, komi að norðan.

Laugardagur 14. september kl. 16:45 í Egilshöllinni í Grafarvogi
FJÖLNIR - SA

• Leikjadagskrá, stöðutafla og tölfræði – (ihi.is)
• Niðurstaðan í fyrra: Deildarmeistarar, 16 leikir 42 stig
• Tap í úrslitakeppni á móti Fjölni, 1-3.

Komnar

• Herborg Rut Geirsdóttir frá Rögle BK í Svíþjóð

Farnar

• María Eiríksdóttir til Karlskrona HK í Svíþjóð
• Ragnhildur Kjartansdóttir í SR

Fyrstu leikir

Fjölnir (ú)
SR (h)
Fjölnir (h)
SR (ú)
SR (h)

Nýr þjálfari og Ingvar Þór inn í teymið hjá SA Víkingum

Karlalið Skautafélags Akureyrar, SA Víkingar, hefur einnig leik á Íslandsmótinu í íshokkí í dag. Þeir mæta Fjölni í Egilshöllinni að leik loknum hjá konunum, eða kl. 19:30. Liðið hefur fengið nýjan þjálfara, Sheldon Reasbeck, eins og fram hefur komið. Hann hefur fengið til liðs við sig í þjálfarateymið einn reyndasta og sigursælasta hokkíleikmann landsins, landsliðsfyrirliðann Ingvar Þór Jónsson. Hann mun án efa nýtast liðinu vel enda kemur hann með ómetanlega reynslu bæði sem leikmaður og þjálfari inn í teymið. 

Það verður áhugavert að fylgjast með þróun mála á Íslandsmóti karla, Hertz-deildinni, í vetur. SA Víkingar hafa nú í tvígang mátt sjá á eftir Íslandsbikarnum suður og í bæði skiptin var það SR sem vann titilinn í Skautahöllinni á Akureyri. Skautafélag Akureyrar hefur verið sigursælt á Íslandsmótinu í karlaflokki í gegnum tíðina, en endrum og sinnum hafa sunnanliðin náð að vinna Íslandsmeistaratitilinn. SA Víkingar urðu deildarmeistarar í fyrra með nokkrum yfirburðum, en misstu af Íslandsmeistaratitlinum eftir tap í oddaleik.

Annað atriði sem mun vonandi gera deildina áhugaverðari er tilkoma fjórða liðsins. Skautafélag Hafnarfjarðar (SFH) var stofnað á dögunum og hefur lagt metnað í að senda lið til leiks á Íslandsmóti karla. Fyrsti leikur SA Víkinga gegn Hafnfirðingum verður þó ekki fyrr en í nóvember.

Laugardagur 14. september kl. 19:30 í Egilshöllinni í Grafarvogi
FJÖLNIR - SA VÍKINGAR

• Leikjadagskrá, stöðutafla og tölfræði – (ihi.is)
• Niðurstaðan í fyrra: Deildarmeistarar, 24 leikir, 64 stig.
• Tap í úrslitakeppni á móti SR, 2-3.

Komnir

• Ólafur Björgvinsson frá Svíþjóð
• Tyler Szturm frá Kanada
• Marek Vybostok frá Slóvakíu

Farnir

• Arnar Kristjánsson til ungmennaliðs EJ Kassel í Þýskalandi
• Jakob Ernfelt Jóhannesson

Fyrstu leikir

Fjölnir (ú)
SR (h)
SR (ú)
Fjölnir (ú)
SR (h)