Íslandsbikarinn á loft í Skautahöllinni?
Kvennalið Skautafélags Akureyrar getur orðið Íslandsmeistari í íshokkí í kvöld með sigri á Fjölni á heimavelli. SA hefur unnið tvo fyrstu leikina en þrjá þarf til þess að tryggja sér Íslandsbikarinn.
SA vann fyrsta leikinn á heimavelli síðastliðinn fimmtudag. Sá var heldur bragðdaufur og hvorki skorað í hefðbundnum leiktíma né framlengingu þannig að grípa þurfti til vítakeppni. Þar var aðeins skorað úr einu víti af 10! Kolbrún Björnsdóttir í liði SA tók fyrsta vítið og skoraði en aðrar tilraunir fóru í vaskinn; annað hvort vörðu markverðirnir eða skotin fóru framhjá.
SA vann annan úrslitaleikinn 4:2 í Egilshöll á laugardaginn.
Með sigri í kvöld verður Stelpurnar okkar Íslandsmeistarar 17. árið í röð!
Leikurinn hefst klukkan 19.30 og Akureyri.net hvetur sem flesta til að mæta og styðja við bakið á stelpunum.
Stelpurnar í SA fagna þegar þær urðu deildarmeistarar á dögunum. „Sá stóri“, Íslandsbikarinn, gæti farið á loft í kvöld. Ljósmynd: Þórir Tryggvason
