Framkvæmdum að ljúka í Skautahöllinni

Umfangsmiklar framkvæmdir við nýja félagsaðstöðu í Skautahöllinni eru á lokametrunum. Sagt er frá því á heimasíðu SA að vonir hafi staðið til að hin nýju rými yrðu komin í notkun í upphafi tímabilsins, en eins og oft vilji verða hafi orðið óhjákvæmilegar tafir á verkinu og því sé tekið með stóískri ró. Þessa dagana er verið að mála og vinna að hefjast við að setja upp húsbúnað í félagsaðstöðunni, auk tækja og tóla í líkamsræktar- og æfingaaðstöðunni.

Gangi allt að óskum gerir Skautafélagsfólk ráð fyrir að nýja aðstaðan verði komin í fulla nýtingu í lok mánaðarins.

Risaskjár sem vakið hefur athygli í hokkíleikjum skemmdist í rafmagnstruflunum í óveðri fyrir rúmu ári, en nú er von á nýjum skjá í húsið í hans stað.