Spænskur varnarmaður til Þórs frá Völsungi

Knattspyrnudeild Þórs hefur samið við spænska varnarmanninn Juan Guardia Hermida um að leika með liðinu næstu tvö árin. Greint er frá þessu á heimasíðu Þórs.

„Juan er 22 ára gamall og hefur leikið á Íslandi undanfarin tvö ár með nágrönnum okkar í Völsungi og var í lykilhlutverki hjá Húsvíkingum þegar þeir fóru upp úr 2.deildinni síðasta sumar. Var Juan meðal annars valinn í lið ársins hjá Fótbolta.net,“ segir þar.

„Hann fékk sitt knattspyrnulega uppeldi hjá spænska stórveldinu Atletico Madrid þar sem hann fór upp í gegnum allt barna- og unglingastarf til 18 ára aldurs. Juan er fjölhæfur varnarmaður sem hefur skorað sjö mörk í 44 leikjum hér á landi. Hann æfði með okkar mönnum á dögunum áður en hann hélt heim til Spánar í jólafrí og mun mæta aftur til Akureyrar í byrjun febrúar.“