Fimm sækjast eftir embætti rektors HA
Fimm sóttu um embætti rektors Háskólans á Akureyri. Umsóknarfrestur rann út 23. nóvember og verður ráðið í embættið til fimm ára frá og með 1. júlí 2024. Starfandi rektor, Elín Díanna Gunnarsdóttir, sækist ekki eftir embættinu. Þetta kemur fram á vef skólans.
Eftirtalin sóttu um embættið:
- Dr. Áslaug Ásgeirsdóttir, prófessor í stjórnmálafræði við Bates College, Lewiston, Maine
- Dr. Brynjar Karlsson, forseti Heilbrigðis-, viðskipta- og raunvísindasviðs Háskólans á Akureyri
- Dr. Margrét Jónsdóttir Njarðvík, rektor Háskólans á Bifröst
- Dr. Sigríður Kristjánsdóttir, skipulagsfulltrúi
- Dr. Sigurður Ragnarsson, lektor við Viðskiptadeild Háskólans á Akureyri
Háskólaráð Háskólans á Akureyri tilnefnir rektor í samræmi við 8. gr. laga nr. 85/2008 um opinbera háskóla og 10. gr. reglna fyrir Háskólann á Akureyri nr. 694/2022 og starfar rektor í umboði háskólaráðs. Háskóla-, iðnaðar- og nýsköpunarráðherra skipar rektor til fimm ára samkvæmt tilnefningu háskólaráðs. Á næstu dögum mun Háskólaráð tilnefna þrjá fulltrúa í valnefnd til að meta hæfi umsækjenda.
Síðsumars kom fram í fréttum að hafnar væru óformlegar viðræður um sameiningu Háskólans á Akureyri og Háskólans á Bifröst. Einn umsækjenda um embætti rektors er einmitt rektor Háskólans á Bifröst, dr. Margrét Jónsdóttir Njarðvík.
