Afar mikilvægur sigur KA – sá fyrsti á útivelli
KA vann ÍR 39:34 á útivelli í gær í Olísdeild karla í handbolta. Sigurinn var gríðarlega mikilvægur og sannarlega kærkominn; þetta var í fyrsta sinn sem KA-menn fagna sigri á útivelli í vetur.
Fyrir leikinn var KA með 10 stig og ÍR með 8 stig í fallsæti. Fjölnir er neðstur með 6 og Grótta er með 10 stig en á leik til góða á hin liðin þrjú. KA-strákarnir höfðu sogast niður í fallbaráttu en eftir gærdaginn eru þeir aðeins tveimur stigum á eftir HK sem er nú í hinu eftirsótta áttunda sæti, því síðasta veitir rétt til þátttöku í úrslitakeppninni.
ÍR komst í 4:1 og var einu til þremur mörkum yfir fyrstu 20 mínúturnar en þá náði KA að jafna, 13:13, og jafnt var á öllum tölum þangað til KA -menn komust yfir í fyrsta skipti, 18:17. Staðan í hálfleik var 19:18 þeim í hag.
Jafnfræði var enn með liðunum fyrstu 10 mínútur seinni hálfleiks en þá skildu leiðir; KA gerði sjö mörk í röð á jafn mörgum mínútum og úrslitin þá í reynd ráðin.
Enn vantaði Bjarna Ófeig Valdimarsson, stórskyttu og varnarjaxl, í lið KA. Hann hefur glímt við meiðsli, var ekki með í fyrsta leiknum eftir jóla- og HM-frí, þegar Valsmenn komu í heimsókn á dögunum, en vonast er til þess að hann geti mætt til leiks fljótlega.
Sex umferðir eru eftir af deildarkeppninni:
- KA - Fram
- HK - KA
- KA - ÍBV
- Stjarnan - KA
- KA - FH
- Fjölnir - KA
Mörk KA í gær: Patrekur Stefánsson 9, Einar Rafn Eiðsson 7 (2 víti), Dagur Árni Heimisson 6, Einar Birgir Stefánsson 6, Ott Varik 5, Logi Gautason 2, Arnór Ísak Haddsson 2, Daði Jónsson 1, Jens Bragi Bergþórsson 1.
Varin skot: Nicolai Hornvedt kristensen 14 (29,2%)
