Fyrsta ferðin: 38 kusu að fara til Liverpool

Það er næsta víst að allir kjósa rétt á kjördag, sama við hvaða framboð merkt er. Fleiri en nokkru sinni gripu reyndar stimpil dagana fyrir kjördag og nýttu kosningaréttinn þannig, eins og komið hefur fram í fréttum, til að hafa tíma fyrir annað í gær. Til dæmis kusu 38 manns að fljúga í gærmorgun með easyJet frá Akureyri til Manchester og bruna þaðan yfir til Liverpool, í ferð sem Akureyri.net stendur fyrir í samstarfi við TA Sport og Premierferðir. Í dag liggur leiðin á Anfield, þar sem fylgst verður með leik Liverpool og Manchester City í ensku úrvalsdeildinni í knattspyrnu.

Beint flug easyJet frá Akureyri til Englands eykur lífsgæði Norðlendinga til muna, á því er enginn vafi; miklu munar að geta flogið beint úr heimahaganum í stað þess að ferðast á suðvesturhornið áður en flogið er til fjarlægra landa.

Gríðarlegur áhugi var á þessari ferð, þeirri fyrstu sem Akureyri.net kemur að, á leik í ensku knattspyrnunni, og deginum ljósara er að ferðirnar verða fleiri. Gera má ráð fyrir a.m.k. einni ferð til viðbótar í vetur í beinu flugi frá Akureyri.