Auðveldur skyldusigur Þórs á ungu liði Fram
Þórsarar unnu stórsigur, 35:23, á liði Fram 2 á heimavelli í gærkvöldi í Grill 66 deildinni í handbolta. Þórsarar eru því efstir í deildinni sem fyrr; hafa nú 18 stig að 10 leikjum loknum, Selfyssingar eru með 16 stig og Víkingar 14.
Þórsliðið missti naumlega af sæti í efstu deild – Olís deildinni – eftir úrslitaeinvígi við Fjölni síðasta vor en stefnir nú hraðbyri upp í deild þeirra bestu.
Leikurinn í gær var sá fyrsti á þessu ári og raunar sá fyrsti í tæpar sjö vikur. Þórsarar léku síðast um miðjan desember gegn Val á útivelli og síðasti heimaleikur var 7. desember þegar Víkingar komu í heimsókn.
Sigur Þórs var mjög öruggur í gær, eins og fyrirfram mátti reikna með, en liðið var þó nokkuð frá sínu besta. Leikmenn gerðu það sem þurfti en munurinn hefði orðið miklu meiri hefðu Þórsarar leikið af fullum krafti allan tímann.
Mörk Þórs: Þórður Tandri Ágústsson 8, Brynjar Hólm Grétarsson 7, Oddur Gretarsson 6, Hafþór Már Vignisson 5, Arnór Þorri Þorsteinsson 3, Þormar Sigurðsson 2, Arnviður Bragi Pálmason 1, Aron Hólm Kristjánsson 1, Halldór Kristinn Harðarson 1, Heiðmar Örn Björgvinsson 1.
Varin skot: Kristján Páll Steinsson 5, Steinar Ingi Árnason 2.
Mörk Fram 2: Arnþór Sævarsson 8, Agnar Daði Einarsson 5, Alexander Bridde Elíasson 4, Theodór Sigurðsson 2, Kristófer Tómas Gíslason 2, Garpur Birgisson 1, Jón Sigurður Bjarnason 1.
Varin skot: Garpur Druzin Gylfason 10, Breki Hrafn Árnason 3.
Hafþór Már Vignisson horfir á eftir þrumufleyg á leið í mark Framara. Hann gerði fimm mörk í leiknum. Lengst til hægri er Brynjar Hólm Grétarsson sem skoraði sjö mörk. Mynd: Skapti Hallgrímsson
