Gervigreind

Vilja hafa göng undir Hörgárbraut á skipulagi

Haraldur Ingólfsson skrifar 17. janúar 2025 | kl. 06:00

Í deiliskipulagi er gert ráð fyrir göngum undir Hörgárbraut á þessum stað. Skipulagsráð telur ekki tímabært að taka göngin út af skipulagi eins og tillaga umhverfis- og mannvirkjasviðs gerði ráð fyrir. Myndin er tekin á göngustígnum norðaustan við Hörgárbrautina, neðan við Lyngholt. Mynd: Haraldur Ingólfsson.

Tillaga umhverfis- og mannvirkjasviðs Akureyrarbæjar um breytingu á deiliskipulagi vegna fyrirhugaðrar jöfnunarstoppstöðvar Strætisvagna Akureyrar norðan Borgarbrautar við Glerártorg verður lögð fyrir bæjarstjórn á næstunni, en með breytingu þar sem skipulagsráð vill halda göngum undir Hörgárbraut inni á skipulaginu.

Skipulagsráð fjallaði núna í vikunni um erindi umhverfis- og mannvirkjasviðs bæjarins þar sem óskað var breytingar á deiliskipulagi Glerár, frá stíflu til sjávar þar sem skilgreind er ný jöfnunarstöð ásamt breytingum á stígum, stofnstígum, göngum, brúm og fleiru. Skipulagsráð leggur til smávægilegar breytingar frá því sem sótt var um þar sem ráðið telur ekki tímabært að göng undir Hörgárbraut séu tekin af skipulagsuppdrættinum.

Myndin sýnir gildandi deiliskipulag fyrir umrætt svæði. Göngubrúin sem þarna er sýnd færist austar, um það bil þar sem bláa strikið er. Rauða strikið sýnir nefndan stað þar sem undirgöng eru í skipulaginu og rauði hringurinn sýnir hvar núverandi biðstöð SVA er staðsett, en umrædd jöfnunarstoppstöð er fyrirhuguð á þeim reit. Skjáskot úr deiliskipulagi.