Maddie Sutton á leið frá Þór til Ástralíu
Maddie Sutton, leikmaður körfuknattleiksliðs Þórs undanfarin þrjú tímabil, er á leið til Ástralíu á næstu dögum.
Hún hefur samið við félagið Joondalup Wolves í borginni Joondalup í vesturhluta Ástralíu. Joondalup er tæplega tíu þúsund manna strandbær skammt norður af stórborginni Perth. Félagið leikur í næstefstu deild í Ástralíu, NBL1, sem er eftir því sem akureyri.net kemst næst mögulega nokkuð sterkari en efsta deild á Íslandi. Deildin er svæðaskipt og spilar liðið í vesturdeildinni. Aðspurð segir Maddie ekki ákveðið hvort hún komi aftur til Akureyrar í haust eftir að deildinni í Ástralíu lýkur.
Hefur alltaf samið til eins árs í senn
Maddie var að ljúka sínu þriðja tímabili með Þór og fjórða tímabili á Íslandi, en þegar hún kom fyrst til Íslands að loknu háskólanámi samhliða körfuboltaferli þar samdi hún við lið Tindastóls á Sauðárkróki sem þá lék í 1. deildinni. Árið eftir samdi hún við Þór og átti stóran þátt í að félagið fór upp í efstu deild þar sem Þór hefur nú spilað í tvö tímabil. Maddie hefur verið lykilleikmaður í liðinu sem hefur náð að því er einhverjum finnst óvæntum árangri í efstu deild á þessum tveimur tímabilum. Bæði árin fór liðið í úrslitakeppnina, í bikarúrslitaleik í fyrra, vann titilinn meistari meistaranna í haust, fór í undanúrslit bikarkeppninnar fyrr í vetur, náði 4. sæti deildarinnar og tapaði naumlega fyrir Val í átta liða úrslitum.
Maddie Sutton er sannkölluð drottning í teignum, sá leikmaður sem tekið hefur flest fráköst allra leikmanna í deildinni að meðaltali og snaraði ítrekað fram þrefaldri tvennu. Mynd: Skapti Hallgrímsson
Lengi langað til Ástralíu
Maddie sagði í samtali við akureyri.net að hana hafi lengi langað til að prófa að spila í Ástralíu og nú hafi tækifærið komið upp í hendurnar á henni. Árin sem hún hefur spilað á Íslandi hefur hún alltaf samið til eins árs í senn og ekki viljað taka ákvörðun um framhaldið með miklar tilfinningar í spilinu í lok tímabils, heldur hefur hún farið heim til Tennessee í Bandaríkjunum, verið í faðmi fjölskyldunnar, slakað á og metið stöðuna áður en hún hefur samið að nýju.
Þrátt fyrir að hafa samið við ástralska félagið segir Maddie að hún hafi verið 100% einbeitt að verkefninu með Þór, að fara eins langt og mögulegt væri í úrslitakeppninni. Það verður auðvitað ekki dregið í efa því í lokaleik einvígisins við Val, sem Valur vann með fimm stiga mun, var hún hæst leikmanna Þórs í öllum helstu tölfræðiþáttunum, skoraði 26 stig, tók 14 fráköst, átti fimm stoðsendingar og var samanlagt með 39 framlagsstig.
