SA á 14 stelpur í U18 landsliðinu í íshokkí
Að venju eiga Akureyringar marga fulltrúa þegar landslið í íshokkí eru valin og taka þátt í keppnum, hvort sem það eru yngri landsliðin eða A-landsliðin. U18 landslið kvenna er þessa dagana statt í Istanbúl í Tyrklandi þar sem liðið keppir í sínum styrkleikaflokki, riðli B í 2. deild, á Heimsmeistaramóti. Þar eru 14 stelpur úr SA, ásamt fulltrúum Akureyringa í starfsliði í kringum liðið.
SA-stelpurnar í U18 landsliðinu í íshokkí. Aftasta röð frá vinstri: Aníta Júlíana Benjamínsdóttir, Silvía Mörk Kristinsdóttir, Arna Sigríður Gunnlaugsdóttir, Freyja Rán Sigurjónsdóttir, Heiðrún Helga Rúnarsdóttir, Aðalheiður Anna Ragnarsdóttir, Magdalena Sulova og Silvía Rán Björgvinsdóttir aðstoðarþjálari. Miðröð frá vinstri: Kolbrún Björnsdóttir, Sveindís Marý Sveinsdóttir, Eyrún Arna Garðarsdóttir, Ragneiður Alís Ragnarsdóttir og Sólrún Assa Arnardóttir. Fremstar eru markverðirnir Díana Lóa Óskarsdóttir og Aníta Ósk Sævarsdóttir.
U18 landsliðshópinn má finna í frétt á vef Íshokkísambandsins, en af 22 leikmönnum eru 14 úr röðum Skautafélags Akureyrar. Stelpurnar hafa nú þegar unnið tvo stórsigra á mótinu, fyrst var það 17-0 sigur gegn Suður-Afríku og síðan 7-0 sigur gegn Belgíu. Sólrún Assa Arnardóttir var valin maður leiksins gegn Suður-Afríku.
Íslenska liðið á tvo erfiða leiki eftir og má segja að báðir séu úrslitaleikir um gullverðlaun. Ísland mætir liði Mexíkó kl. 16 í dag og má fylgjast með leiknum í beinu streymi á YouTube.
Markasúpa og hreint mark hingað til
Í sigrinum gegn Suður-Afríku skoraði Sólrún Assa Arnardóttir þrjú mörk og átti þrjár stoðseningar. Mörk og stoðsendingar hjá öðrum SA-stelpum í leiknum: Sólrún Arnardóttir 3/3, Magdalena Sulova 1/4, Kolbrún Björnsdóttir 2/2, Eyrún Garðarsdóttir 2/1, Sveindís Sveinsdóttir 1/1, Heiðrún Rúnarsdóttir 1/0, Silvía Mörk Kristinsdóttir 0/1, Aníta Júlíana Benjamínsdóttir 0/1. Þá skoraði Friðrika Magnúsdóttir úr SR fjögur mörk og átti fjórar stoðsendingar, en hún er af mikilli hokkíætt hér í bæ, dótturdóttir Ásdísar Sæmundsdóttur og Leifs Ólafssonar.
Sveindís Sveinsdóttir fyrirliði U18 landsliðsins ásamt fyrirliða Belgíu og dómurum leiksins. Mynd: Elísabet Ásgrímsdóttir.
Sólrún Assa var síðan valin maður leiksins í sigrinum gegn Belgum. Mörk og stoðsendingar SA-stelpnanna í þeim leik: Kolbrún Björnsdóttir 2/1, Magdalena Sulova 1/0, Sólrún Assa Arnardóttir 0/3, Ragnhreiður Alís Ragnarsdóttir 0/1, Heiðrún Rúnarsdóttir 0/1. Aftur var það Friðrika Magnúsdóttir úr SR sem var efst á lista með tvö mörk og tvær stoðsendingar.
Fólkið í kringum liðið er síðan einnig mjög tengt Skautafélagi Akureyrar:
- Silvía Rán Björgvinsdóttir er aðstoðarþjálfari
- Sólveig Hulda Valgeirsdóttir hjúkrunarfræðingur
- Elísabet Ásgrímsdóttir fararstjóri
- Teresa Snorradóttir er aðstoðarþjálfari. Hún spilar með Fjölni, en kemur upphaflega úr röðum SA.
Örn Smári Kjartansson, eða Örri eins og hann er oftast nefndur, lætur sig ekki vanta á kappleiki þar sem dóttirin, Sólrún Assa, kemur við sögu. Mynd: Elísabet Ásgrímsdóttir.
