Sandra og Alex kjörin íþróttafólk Akureyrar

Sandra María Jessen knattspyrnukona úr Þór/KA og Alex Cambray Orrason kraftlyftingakappi úr KA þóttu skara fram úr öðrum íþróttamönnum á Akureyri á síðasta ári; Sandra María var kjörin íþróttakona Akureyrar 2024 og Alex Cambray íþróttakarla Akureyrar 2024 á íþróttasviðinu.

Niðurstaða árlegs kjör var kunngjörð á íþróttahátíð sem Íþróttabandalag Akureyrar og Akureyrarbær stóðu fyrir í menningarhúsinu Hofi síðdegis í dag.

Þetta er annað árið í röð sem Sandra María er íþróttakona Akureyrar en Alex Cambray hlotnaðist heiðurinn í fyrsta skipti. Hann var kjörinn íþróttakarl KA á dögunum og Sandra María var nýlega kjörin íþróttakona Þórs.

• Í öðru sæti í kjörinu urðu Baldvin Þór Magnússon, hlaupari úr Ungmennafélagi Akureyri, sem var íþróttakarl Akureyrar 2023, og Hafdís Sigurðardóttir, hjólreiðakona úr HFA, sem kjörin var íþróttakona Akureyrar 2022.
• Í þriðja sæti að þessu sinni voru Þorbergur Ingi Jónsson hlaupari úr UFA og Julia Bonet Carreras blakkona úr KA. 
• Í fjórða sæti urðu Hans Viktor Guðmundsson knattspyrnumaður úr KA og Eva Wium Elíasdóttir körfuboltakona úr Þór.
• Í fimmta sæti urðu Veigar Heiðarsson kylfingur úr Golfklúbbi Akureyrar og Anna María Alfreðsdóttir bogfimikona úr Akri. 

ALEX CAMBRAY ORRASON

Í umsögn ÍBA um íþróttakarl ársins á Akureyri sagði meðal annars:

• Alex Cambray Orrason er íþróttakarl Akureyrar í fyrsta sinn. Hann átti afbragðs ár í kraftlyftingum; setti nokkur Íslandsmet, náði fremsta árangri allra íslenskra karlkyns keppenda á alþjóðamótum, ásamt því að sigrað á öllum innlendum mótum ársins í keppni með búnaði, óháð þyngdarflokki.
• Í mars keppti Alex á Íslandsmeistaramótinu í kraftlyftingum með búnaði, þar sem hann varð Íslandsmeistari í sínum þyngdarflokki. Varð hann þar stigahæsti lyftari mótsins óháð þyngdarflokki.
• Í maí keppti hann á Evrópumeistaramótinu sem haldið var í Lúxemborg. Þar keppti hann í sterkum flokk og lenti í 5. sæti og sló Íslandsmetið í samanlögðu með því að lyfta 840 kg samtals. Hann lyfti meðal annars 292.5kg í réttstöðulyftu sem er Íslandsmet í hans flokki.
• Þá keppti hann á bikarmóti í kraftlyftingum í 105 kg flokki og sló þar Íslandsmet í hnébeygju með 360,5 kg lyftu en það er stigahæsta hnébeygja sem hefur verið tekin á Íslandi. Hann vann sinn flokk og var jafnframt stigahæstur óháð þyngdarflokki sem tryggði honum bikarmeistaratitilinn.
• Í nóvember keppti Alex á heimsmeistaramótinu í kraftlyftingum með búnaði sem haldið var hérlendis. Lenti hann þar í 9. sæti með 837.5 kg í samanlagðri þyngd og átti góðan dag í hnébeygju þar sem hann endaði í 6. sæti. Alex lýkur árinu sem fjórtándi öflugasti lyftari ársins á heimslista alþjóða kraftlyftingasambandsins (IPF) og í 7. sæti á styrkleikalista Evrópska lyftingasambandsins (EPF). Nú í upphafi árs 2025 var Alex kjörinn íþróttakarl KA fyrir árið 2024.

SANDRA MARÍA JESSEN

Í umsögn ÍBA um íþróttakonu ársins á Akureyri sagði meðal annars:

• Sandra María Jessen er íþróttakona Akureyrar í annað sinn. Hún er mikilvægur liðsmaður í ungu en öflugu liði Þórs/KA, fyrirmynd fyrir yngri iðkendur í ástundun, hugarfari, vinnuframlagi og baráttu, innan vallar sem utan.
• Sandra María var valin besti leikmaður Þórs/KA að loknu keppnistímabilinu 2024. Hún var algjör lykilleikmaður í frábærum árangri Þórs/KA í mótum ársins. Hún er fyrirliði liðsins, reyndasti leikmaður þess og skoraði langflest mörk allra leikmanna.
• Með liði Þórs/KA endaði hún í 4. sæti Bestu deildarinnar ásamt því að spila til undanúrslita í bæði Lengjubikar og Mjólkurbikarkeppni KSÍ.
• Sandra María var valin besti leikmaður Bestu deildarinnar af leikmönnum deildarinnar og var að auki markadrottning deildarinnar. Hún skoraði alls 33 mörk í leikjum Þórs/KA í KSÍ-mótunum, 22 mörk í 23 leikjum í Bestu deildinni, tvö mörk í þremur leikjum í Mjólkurbikarkeppninni og níu mörk í sex leikjum í Lengjubikarnum. Að auki átti hún tíu stoðsendingar í þessum 32 leikjum. Þá kom hún við sögu í níu landsleikjum, í byrjunarliði í mörgum þeirra. Nú í upphafi árs 2025 var Sandra María kjörin íþróttakona Þórs fyrir árið 2024.