Vél easyJet á leið til Akureyrar á ný
Flugvél easyJet sem ekki gat lent á Akureyri í hádeginu í dag og var snúið til Keflavíkur er nú á leið norður. Áætluð lending er kl. 16.23 og farþegum, sem beðið hafa á Akureyrarflugvelli síðan í morgun, hefur verið tilkynnt að brottför flugs til Manchester verði kl. 17.00.
Farþegar í vélinni fengu ekki að fara frá borði þegar lent var í Keflavík heldur biðu í vélinni. Samkvæmt upplýsingum Akureyri.net eru um 80 farþegar í vélinni.
Ekki væsti um farþegana sem varið hafa deginum á Akureyrarflugvelli þótt þeim leiddist biðin en óánægju gætti þó vegna þess hve litlar upplýsingar var að hafa. Ekki dugði að fylgjast með gangi mála á vef Isavia; þegar skjáskotið hér að neðan var tekið klukkan 14:25 sagði enn að flugið til Manchester væri á áætlun – brottför klukkan 12:05.
Þess má geta að þegar vél easyJet sem kom frá London í dag hafði létt til, hún lenti á Akureyrarflugveli kl. 14:17 og hélt utan á ný kl. 15:46.
VIÐBÓT KL 17.55 - vél easyJet á leið til Manchester hóf sig á loft frá Akureyrarflugvelli kl. 17.52, tæpum sex klukkustundum á eftir áætlun.
