Niceair flýgur til Manchester

Niceair flýgur frá Akureyri til Manchester í Englandi næsta vetur. Þetta kemur fram í stuttri tilkynningu sem birt var á Facebook síðu félagsins í gær. Fyrsta flug þangað verður í byrjun október.

„Við munum fljúga vikulega til Tenerife út október og svo aftur í kringum jól og áramót. London og Kaupmannahöfn halda áfram inn í veturinn og Manchester bætist við tvisvar sinnum í viku frá byrjun október.

Þú kemst í sólina áfram, kíkkar á leik í Manchester (nú eða Liverpool), færð menninguna í London og aðventuna í allri sinni dýrð í Köben“ segir í tilkynningunni.

Opnað verður fyrir bókanir í vetrarferðir á allra næstu dögum.