Eflum löggæslu

Eitt af fáum kosningaloforðum Viðreisnar fyrir komandi kosningar sem kalla á útgjöld er að við ætlum að fjölga lögreglumönnum. Ég hef starfað sem lögreglumaður í ríflega 37 ár og ég veit að það vantar lögreglumenn á flesta pósta.

Stór verkefni

Þó að lögreglumenn á Íslandi séu fáir er um einvalalið að ræða sem við getum verið stolt af. Best sýnir hæfni og geta þeirra sig þegar mikið er að gera og ná þarf utan um stóra atburði eða verkefni. Við þær aðstæður leggjast allir á eitt og útkoman er yfirleitt góð. Varðandi verkefni sem vel hefur tekist til með má nefna verkefni lögreglu sem tengdust heimsfaraldrinum, verkefni almannavarnardeilda vegna eldsumbrota á Reykjanesi, fund Evrópuráðsins í maí 2023 og fund Norðurlandaráðs í október sl., þar sem forseti Úkraínu var á meðal gesta.

Það er mikilvæg staðreynd að á Íslandi eru ekki óupplýst manndrápsmál frá síðustu áratugum, upplýst hafa verið stór og viðamikil fíkniefnamál, fækkun opinna kynferðisbrotamála, frumkvæðisvinna lögreglumanna við að koma á fót vísi að samfélagslöggæslu og við eftirlit á innri landamærum. Við höfum tekið upp breytt verklag við rannsóknir á heimilisofbeldi sem hefur aukið öryggi þolenda, mikil hæfni hefur áunnist við tækni og tölvubrotarannsóknir og eru þá ekki talin fjöldamörg verkefni þar sem árangur af starfi lögreglunnar er frábær. Lögreglan á Íslandi sinnir löggæslu á stórum alþjóðaflugvelli og nokkrum minni flugvöllum, nokkrum alþjóðlegum höfnum, hefur á að skipa umferðardeildum, greiningardeild og sérsveit og eru þá nefndar aðeins fáar sérhæfðar einingar sem lögregla hefur á að skipa.

Fjölga þarf lögreglumönnum

Hvernig verður búið svo að lögreglunni að hún geti sinnt hlutverki sínu, sem talið er hér að framan, með þeim sóma sem við viljum öll að hún geri? Að mínu mati þarf að fjölga lögreglumönnum myndarlega og það þarf að hefjast handa við það eins fljótt og verða má og gera þarf ítarlega áætlun um hvernig best verði staðið að fjölgun lögreglumanna um land allt. Um leið þurfum við að huga þarf að því að nægilegur fjöldi lögreglumanna verði menntaður og fjölgun lögreglumanna verði stigvaxandi þar til lokamarki er náð.

Í dreifbýli og í fámennari byggðalögum eru lögreglumenn fáir en þeir gegna veigamiklu öryggishlutverki hvað varðar afbrot, almannavarnir og eftirliti á þjóðvegum, svo eitthvað sé nefnt. Fyrir þá sem sinna öryggishlutverki fyrir sitt svæði skiptir þeirra eigið öryggi miklu máli og það er mikilvægt að lögreglumenn séu aldrei einir við störf.

Auk fjölgunar lögreglumanna þarf að fjölga borgaralegum starfsmönnum með sérhæfða menntun og þjálfun sem nauðsynlegt er að lögregla búi yfir í starfsemi sinni. Með fjölgun lögreglumanna verður mögulegt að auka sýnileika lögreglu, en mjög er kallað eftir auknum sýnileika og möguleika á auknu viðbragði við tilteknar aðstæður. Þá verður hægt að styrkja verulega verkefni sem lúta að samfélagslöggæslu og auka þannig samskipti við fólkið. Það skiptir máli að fólk upplifi að tekið sé á glæpum eins og líkamsárásum og innbrotum sem oft skilja eftir sig mikið óöryggi og vanlíðan hjá fórnarlömbum slíkra glæpa.

Eins þurfum við að vera vakandi þegar kemur að landamæragæslu, einkum á Keflavíkurflugvelli og í stærstu höfnum landsins. Með því móti verði hlutverk lögreglu skýrt er varðar erlenda aðila sem hingað leita í þeim tilgangi að stunda hér brotastarfsemi. Að auki verði rannsóknarlögreglumönnum fjölgað við rannsóknir á skipulagðri brotastarfsemi og alvarlegum líkamsárásum og manndrápum.

Viðreisn mun að loknum kosningum setja fjölgum lögreglumanna í forgang og koma þannig löggæslu á það stig að sómi sé að.

Breytum þessu.

Grímur Grímsson er yfirlögregluþjónn hjá lögreglunni á höfuðborgarsvæðinu og skipar þriðja sæti á lista Viðreisnar í Reykjavíkurkjördæmi norður.