Fréttir

Viðbyggingu ráðhúss aðeins slegið á frest

Haraldur Ingólfsson - haraldur@akureyri.net 03.09.2024 kl. 06:00

Velferðarsvið og fræðslu- og lýðheilsusvið bæjarins eru til húsa í Glerárgötu 26 og verða áfram. Húsið númer 26 er til vinstri á myndinni. Mynd: Skapti Hallgrímsson

Áformum um viðbyggingu við Ráðhús Akureyrar hefur verið slegið á frest, en ekki hefur verið hætt við verkefnið. Þetta kemur fram í svari Ásthildar Sturludóttur bæjarstjóra við fyrirspurn Akureyri.net. Ástæða þess að ekki var haldið áfram með verkefnið er að núverandi meirihluti ákvað við gerð fjárhagsáætlunar haustið 2022 að leggja áherslu á önnur verkefni en að byggja við ráðhúsið.

Ástæða vangaveltna um hvað varð um þessi áform er að bæjarráð Akureyrarbæjar samþykkti í sumar nýjan húsaleigusamning við Reyki fasteignafélag ehf. um fasteignina Glerárgötu 26, en þar eru velferðarsvið og fræðslu- og lýðheilsusvið til húsa. Leigusamningurinn er til 15 ára og gerir ráð fyrir að húsnæðið verði uppfært og endurbætt. Fulltrúar V-lista bókuðu við þessa afgreiðslu bæjarráðs og leggja þann skilning í málið að meirihlutinn hafi hætt við áformin um viðbyggingu ráðhússins.

Yrki vann hönnunarsamkeppnina

Í mars 2021 var efnt til forvals vegna hönnunarsamkeppni og 15. júlí sama ár var tilkynnt að dómnefnd hefði ákveðið að veita Yrki arkitektum 1. verðlaun fyrir tillögu að viðbyggingu og endurbótum og var sú tillaga því valin til frekari hönnunar og útfærslu. Fjórtán umsóknir bárust í forvalinu og var fjórum arkitektastofum boðið að taka þátt í hönnunarsamkeppninni.

Í vinningstillögunni er nýr aðalinngangur á milli nýja skrifstofuhlutans og núverandi ráðhúss.

Núverandi aðalinngangur er aflagður og austurhlið hússins færð í upprunalegt horf, en upphaflegur aðalinngangur heldur sér sem aðkoma fyrir starfsfólk.

Í fréttatilkynningu bæjarins þegar tilkynnt var um niðurstöðu dómnefndar segir meðal annars að markmiðið með framkvæmdinni sé að færa alla miðlæga starfsemi Akureyrarbæjar á einn stað, en stjórnsýslan hefur verið til húsa bæði í Geislagötu 9 og Glerárgötu 26. „Með því að sameina alla stjórnsýslu sveitarfélagsins undir einu þaki í húsnæði sem er alfarið í eigu Akureyrarbæjar næst fram umtalsvert hagræði og mun lægri rekstrarkostnaður til lengri tíma litið,“ segir einnig í tilkynningunni.

Bráðnauðsynlegar endurbætur í Glerárgötunni

Leigusamningurinn um húsnæðið í Glerárgötunni var samþykkt af meirihluta bæjarráðs, en Sindri Kristjánsson S-lista og Sunna Hlín Jóhannesdóttir B-lista sátu hjá. Þá lýstu Sindri og Sif Jóhannesar Ástudóttir V-lista sig ósammála þeirri ákvörðun meirihluta L-lista, Sjálfstæðisflokks og Miðflokksins „að hætta við áform um viðbyggingu og endurbætur á ráðhúsinu,“ eins og þau orðuðu það í bókuninni, en sögðu þó að ljósið í myrkrinu væri að ráðist yrði í bráðnauðsynlegar endurbætur á húsnæðinu í Glerárgötu 26. Sindri og Sif lögðu fram eftirfarandi bókun um málið:

Fyrir rétt tæpum þremur árum birtist á vef bæjarins tilkynning um að niðurstaða væri komin í hugmyndasamkeppni um viðbyggingu og endurbætur á ráðhúsinu á Akureyri. Þar var endahnútur bundinn á verkefni þar sem óskað var eftir tillögum að framtíðarsýn um að koma allri stjórnsýslu bæjarins fyrir á einum og sama staðnum. Tilkynningin er enn aðgengileg á vef Akureyrarbæjar. Málið sem hér er til umræðu er afleiðing ákvörðunar meirhluta L-lista, Sjálfstæðisflokks og Miðflokksins um að hætta við þessi áform. Þeirri ákvörðun erum við alfarið ósammála. Ljósið í myrkrinu er að í staðinn verður ráðist í bráðnauðsynlegar endurbætur á húsnæðinu á Glerárgötu 26 starfsfólki og notendum til mikilla hagsbóta.

Til baka í fréttayfirlit