Varnir styrktar á Oddeyri eftir sjávarflóð
![](/static/news/lg/c6t4cm0a476sqoosneb8qq.jpg)
Vinna er þegar hafin við að styrkja varnir þar sem sjávarflóð gekk á land á Oddeyrinni í lok september í fyrra og olli verulegu tjóni á nokkrum stöðum, til að mynda stórtjóni hjá Blikk- og tækniþjónustunni. Nú þegar er búið að gera vörn til bráðabirgða á 150 metra löngum kafla, þar sem megnið af sjónum gekk á land, frá Strýtuhúsinu og suður að Oddeyrarbryggju.
Efling fráveitukerfis til skoðunar
Hér er ekki um stórt verkefni að ræða að sögn Andra Teitssonar, formanns umhverfis- og mannvirkjaráðs, það er að fylla upp í það svæði sem um ræðir. Hann segir þó einnig hugsað til lengri tíma og athugað hvort efla þurfi fráveitukerfið á tilteknu svæði sunnarlega á Oddeyrinni og mögulega að endurskilgreina hæðarsetningu húsa sem verða byggð þar í framtíðinni.