Tónlistarnemendur og leikskólabörn mætast

Barnamenningarhátíð hefst á Akureyri í dag, 1. apríl og fer ljúflega af stað með Söngvavori, verkefni sem Tónskóli Sigursveins hefur staðið fyrir í áraraðir í samvinnu við leikskóla í Reykjavík. „Á síðasta ári var gerð tilraun með að útvíkka verkefnið og það svo tekið skrefinu lengra í ár en nú verða Söngvavorstónleikar í Hörpu, í Grafarvogi, í Kópavogi, í Borgarnesi, á Austurlandi, á Ísafirði og í Hofi á Akureyri,“ segir 

Una Björg Hjartardóttir, aðstoðarskólastjóri Tónlistarskólans á Akureyri.

„Tónlistarskólinn á Akureyri er heimahöfn verkefnisins á Norðurlandi og erum við fyrst til að halda tónleika í ár,“ segir Una Björg. „Tónleikarnir eru opnunaratriði Barnamenningarhátíðar 2025. Þar er fremst í stafni eldhuginn Elfa Lilja Gísladóttir en þetta verkefni er hennar hugarfóstur og ástríða. Á hverju ári halda tónlistar- og leikskólanemar tónleika í Hörpu þar sem einhver lagahöfundur eða lagahöfundar eru í forgrunni.“

 

Samvinna tónlistarnemenda og leikskólabarna

„Í ár er ljóðskáldið og lagahöfundurinn Bragi Valdimar Skúlason í forgrunni og munum við flytja 4 lög eftir hann á tónleikunum sem bera yfirskriftin Leikur að orðum,“ segir Una Björg. „Leikskólarnir sem taka þátt eru Álfaborg á Svalbarðseyri, Álfasteinn í Hörgársveit og frá Akureyri leikskólarnir Hólmasól, Hulduheimar, Kiðagil, Klappir, Krógaból, Lundarsel-Pálmholt, Naustatjörn og Tröllaborgir. Söngstjóri er Margrét Árnadóttir. Undirleik annast hljómsveit skipuð nemendum frá Tónlistarskólanum á Akureyri og hljómsveitarstjóri er Ásdís Arnardóttir. Sérstakir gestir eru nemendur í A-blásarasveit tónlistarskólans undir stjórn Sóleyjar Bjarkar Einarsdóttur en þau munu leika eitt lag á tónleikunum.“ 

Hólmasól

Hulduheimar

Krógaból

Lundasel-Pálmholt

Tröllaborgir

 

Álfaborg

Álfasteinn

Klappir

Kiðagil

Naustatjörn