Naustagata 13: Verslun, þjónusta og íbúðir

Kista byggingarfélag, lóðarhafi Naustagötu 13, hefur í hyggju að reisa þar tvö hús með blöndu af verslun, þjónustu og íbúðum og hefur óskað eftir deiliskipulagsbreytingu á lóðinni með það fyrir augum að bæta nýtingu lóðarinnar til muna og koma þar fyrir vönduðu samspili verslunar- og þjónustu, og hugsanlega íbúðabyggðar, eins og það er orðað í greinargerð Kollgátu fyrir hönd lóðarhafans.

Naustagata 13 liggur að Davíðshaga, sunnan við hringtorgið á mótum Kjarnagötu og Naustagötu, eins og sjá má á yfirlitsmyndinni hér að ofan. Appelsínugulu línurnar afmarka svæði sem skilgreind eru sem íbúðarsvæði.

Á yfirlitsmyndinni má einnig sjá lóðina sem afmörkuð hefur verið fyrir leikskóla á svæðinu. Samkeppni um hönnun og byggingu leikskólans hefur farið fram og varð tillaga Húsheildar Hyrnu fyrir valinu, eins og Akureyri.net greindi frá í frétt nú í vikunni. Bæjarráð hefur samþykkt að ganga til samninga við Húsheild Hyrnu. Akureyrarbær hefur nýlega auglýst breytingu á skipulagi svæðisins sem tekur til lóðarinnar Naust 2 þar sem afmörkuð er 9.328 fermetra lóð fyrir leikskólann úr landi Nausta II. Innakstur verður austan við lóðina frá Naustagötu. Niðurrif bæjarhúsa að Naustum II hefur verið heimilað. Frestur til að skila inn athugasemdum við þessa breytingu er til 15. ágúst.

Sóttu um framkvæmdafrest í febrúar

Upphafleg úthlutun lóðarinnar Naustagötu 13 til Kistu byggingarfélags var ákveðin af skipulagsráði 12. október 2022. Í febrúar 2024 var óskað eftir framkvæmdafresti, en skipulagsráð samþykkti þá ekki að veita frekari frest til framkvæmda á lóðinni og leit svo á að fresturinn rynni út 5. júní. 

Aftur kom umsókn frá lóðarhafa um framkvæmdafrest til afgreiðslu í skipulagsráði 10. apríl, þá sótt um frest til eins árs, en skipulagsráð samþykkti að veita umsækjanda frest til 5. september til að leggja fram tillögu að uppbyggingu á lóðinni. „Forsenda slíkrar tillögu er að byggingarmagn fyrir verslun og þjónustu á jarðhæð haldist óbreytt frá gildandi deiliskipulagi,“ segir í afgreiðslu ráðsins 10. apríl. Sunna Hlín Jóhannesdóttir B-lista bókaði þá að hún teldi ekki forsvaranlegt að taka aftur mál á dagskrá sem afgreitt var 28. febrúar án þess að breytingar hafi orðið á forsendum. Sagði slík vinnubrögð ekki gefa gott fordæmi.

Aukið byggingarmagn og breytt skilgreining

Tillaga Kistu byggingarfélags um uppbyggingu á lóðinni kom til afgreiðslu í skipulagsráði núna í vikunni og samþykkti ráðið þá að veita framkvæmdafrest til 1. maí 2025. „Lóðarhafi leggur ríka áherslu á að fyrirliggjandi erindi fái jákvæða umfjöllun og skjóta afgreiðslu. Naustagata 13 er næsta verkefni á tímalínunni og ekki mun standa á lóðarhafa að hefja undirbúning að byggingu glæsilegra mannvirkja á lóðinni,“ segir meðal annars í umsókninni.

Í meginatriðum felst umsóknin, vegna uppbyggingar á lóðinni, í eftirfarandi, samkvæmt afgreiðslu skipulagsráðs:

• að lóðin verði skilgreind fyrir blandaða notkun verslunar- og þjónustu og íbúðabyggðar
• að lágmarksbyggingarmagn verslunar- og þjónustu verði 1.045 fermetrar
• að byggingarmagn lóðarinnar verði hækkað úr 950 fermetrum í 4.750 fermetra
• að byggingarreitur verði endurmótaður
• að gera megi ráð fyrir fimm hæða húsi á vesturhluta lóðar

Röksemd umsækjanda fyrir hækkuðu byggingarmagni eru að gildandi deiliskipulagsskilmálar geri ráð fyrir óásættanlegri nýtingu á „þessari annars stóru og vel staðsettu verslunar- og þjónustulóð,“ eins og segir í umsókninni. Bent er á að nýtingarhlutfallið 0,20 í gildandi skilmálum sé mjög lágt í samanburði við sambærilegar lóðir í stærri sveitarfélögum landsins. Einnig er bent á þörfina á að endurmóta byggingarreitinn og að gera megi ráð fyrir hærri byggingu en núgildandi skilmálar segja til um, meðal annars af því að núgildandi skilmálar taki ekki tillit til landhalla og því yrði mjög óhagkvæmt að byggja þarna einnar hæðar hús.