Fréttir
ME hvetur til þáttöku í „Long Covid Rocks“
15.03.2025 kl. 18:00
Í tilefni af alþjóðlegum Long Covid degi sem er í dag, 15. mars, tekur ME félagið þátt í alþjóðlega átaksverkefninu Long Covid Rocks út mánuðinn. „Það er gert til að vekja athygli á alvarlegum áhrifum Long Covid, meðal annars á börn. Markmið átaksins er að draga fram í dagsljósið þær áskoranir sem börn með Long Covid standa frammi fyrir. Auk þess að bæta skilning almennings og hvetja hið opinbera til aðgerða,“ segir í tilkynningu frá ME félaginu.
ME félagið hvetur fólk til þess að taka þátt í átakinu með með því að mála steina og skrifa á þá uppbyggjandi skilaboð, skilja þá eftir á almannafæri og birta af þeim myndir. Nánar um það neðar í fréttinni.
Börn föst heima vegna Long Covid
Eftir Covid-19 hafa börn glímt við langvarandi veikindi (það sem kallað er Long Covid) sem hindra þau í að sækja skóla og taka þátt í daglegu lífi, að því er segir í tilkynningunni. „Þau eru mörg hver föst heima eða í sérúrræðum vegna veikinda sinna. Þrátt fyrir alvarleika málsins hefur umfjöllun og viðurkenning á vandanum verið takmörkuð. Það skortir mikið á aðgerðum til stuðnings þessum börnum.“
Hvernig virkar Long Covid Rocks?
ME félagið hvetur almenning til að taka þátt í átakinu með eftirfarandi hætti:
- Mála steina og skrifa á þá uppbyggjandi skilaboð eða setningar sem vekja athygli á Long Covid, t.d. „Long Covid skiptir máli“, „Börn með Long Covid“ eða „Sýnum stuðning“.
- Skilja steinana eftir á almannafæri, svo sem í almenningsgörðum, við skóla eða göngustíga. Það er gert til að vekja athygli á málefninu og skapa umræðu.
- Deila myndum af steinum sem þú staðsetur eða rekst á, á samfélagsmiðlum með myllumerkjunum:
#LCKRocks
#MyLongCovidRock
#LCSteinninnMinn
#EftirstodvarCovid
ME félagið segir miklu máli að taka þátt. „Long Covid er alvarlegt heilbrigðisvandamál sem hefur haft veruleg áhrif á líf fjölda barna og fjölskyldna þeirra. Skilningur á stöðu þessara barna er mjög takmarkaður og úrræði á vegum þess opinbera fá. Mörg þessara barna og fjölskyldur þeirra þurfa að berjast fyrir viðurkenningu á veikindunum,“ segir í tilkynningu frá félaginu. „Með þátttöku í Long Covid Rocks vill ME félagið vekja athygli á þessum alvarlega vanda, auka umræðu og stuðla að breytingum í samfélaginu.“
Allir geta tekið þátt!
„Með því að mála stein, deila upplýsingum eða ræða málið við vini og fjölskyldu er hægt að vekja þannig athygli á málefninu. Það styður við þá sem glíma við langvarandi afleiðingar af Covid-19,“ segir að síðustu í tilkynningunni.