Húsnæði ÁTVR við Hólabraut verður selt

Fyrrum húsnæði ÁTVR á Akureyri í miðbæ Akureyrar hefur staðið tómt síðan Vínbúðin var flutt á Norðurtorg í byrjun mars, en verður svo líklega ekki til lengdar.

Eins og Akureyri.net hefur sagt frá hafa verið skiptar skoðanir um flutning Vínbúðarinnar á Norðurtorg en margir bæjarbúar eru hins vegar forvitnir um hvaða starfsemi muni koma í húsnæðið sem áður hýsti Vínbúðina við Hólabraut.

• Bæjarstjórinn vill hafa Vínbúð í miðbænum
• Flestir íbúar á hverja vínbúð á Akureyri

Akureyri.net leitaði svara hjá Sigrúnu Ósk Sigurðardóttur, aðstoðarforstjóra ÁTVR, varðandi hvað verður um húsnæðið við Hólabraut og fékk þau svör að húsnæðið sem er í eigu ÁTVR verður selt. Húsnæðið, sem hýsti Vínbúðina í tæp 64 ár, er í heildina 800 fm að stærð og getur því verið áhugavert tækifæri fyrir framtakssamt fólk.