Gul viðvörun og vetrarveður næstu daga

Veðurstofa Íslands hefur sent frá sér gula viðvörun fyrir Norðurland eystra, Austurland að Glettingi, miðhálendið, Strandir og Norðurland vestra. Búast má við vetrarfærð á fjallvegum norðan og austanlands í nótt og á morgun. Spáð er norðlægri átt á mánudag, slyddu eða snjókomu og vægu frosti á norðanverðu landinu.

Í viðvörun fyrir Norðurland eystra sem tekur gildi á miðnætti í kvöld og stendur fram til kl. 23 á sunnudagskvöld segir: „Norðvestan 10-18 m/s og slydda eða snjókoma á fjallvegum, hvassast austantil. Skyggni getur orðið mjög takmarkað og hálka líkleg. Líkur á vetrarfærð, þ.a. ekki ætti að leggja í langferðir á vanbúnum bílum.“

Athugasemd veðurfræðings, skrifuð í morgun: „Búist er við vetrarfærð á fjallvegum norðan- og austanlands í nótt og á morgun. Vegfarendur ættu að kanna vel ástand vega og veðurspár áður en lagt er af stað. Veðurviðvaranir hafa verið gefnar út. Einnig er búist við snjókomu og vertarfærð víða á norðanverðu landinu á mánudag.“

Veðurspáin frá því í morgun fyrir allt landið, sem gildir fyrir næsta sólarhring hljómar svona: „Gengur í austan og norðaustan 5-13 m/s með rigningu, fyrst sunnantil. Hiti 6 til 12 stig. Vestlægari í kvöld, bætir í vind og kólnar. Norðvestan og vestan 8-13 m/s á morgun, en 13-18 um landið norðaustanvert. Víða rigning eða slydda og snjókoma á heiðum norðantil, en bjart með köflum og yfirleitt þurrt á Suður- og Vesturlandi eftir hádegi. Hiti 1 til 9 stig, hlýjast syðst. Lægir heldur, rofar víða til annað kvöld og kólnar heldur.