Fyrsta markið var ekki fyrsta markið

Fyrsta marki leikmanna í meistaraflokki eða fyrsta marki í efstu deild ber að fagna enda þykir það ákveðinn áfangi á ferli leikmanna. En stundum er fyrsta markið þitt ekki skráð sem þitt mark heldur sjálfsmark andstæðings, með réttu eða röngu.

Í leik Þórs/KA og Tindastóls skoruðu tvær Þór/KA-stelpur sitt fyrsta mark í efstu deild. Emelía Ósk Krüger skoraði fimmta markið í 5-0 sigrinum í Boganum, en áður hafði Iðunn Rán Gunnarsdóttir skorað sitt fyrsta þegar hún kom Þór/KA í 3-0. Það skondna reyndar í þessu samhengi að dómarar leiksins skráðu markið á Huldu Ósk Jónsdóttur á leikskýrslu þannig að þegar þessi frétt birtist er Iðunn Rán ekki enn formlega búin að fá fysta A-deildarmarkið sitt viðurkennt. 

Í júní í fyrra taldi Iðunn Rán sig hafa skorað sitt fyrsta mark í efstu deild þegar hún jafnaði leik Þórs/KA og Stjörnunnar á Þórsvellinum í 3-3 eftir að Stjarnan hafði náð þriggja marka forystu í fyrri hálfleik. Mark Iðunnar í leiknum var hins vegar skráð sem sjálfsmark þar sem boltinn fór í stöngina, þaðan í markvörð Stjörnunnar og svo að endingu í markið.

Reglan er víst sú að ef boltinn stefnir ekki inn í markið þegar hann kemur við andstæðing með þeim afleiðingum að hann fer í markið er það skráð sem sjálfsmark. Var það metið svo að þegar boltinn fór af stönginni og var á leið í markmanninn hafi hann ekki stefnt inn í markið.

Akureyri.net náði góðri myndasyrpu af þessu marki og fögnuði Þórs/KA-kvenna þegar þær höfðu jafnað leik sem virtist 45 mínútum áður vera gjörtapaður. En leikurinn er ekki búinn þegar hann er hálfnaður.