Eining og Iðja saman í aldarfjórðung

Þann 15. maí 1999 var formlega gengið frá samruna Verkalýðsfélagsins Einingar og Iðju, félags verksmiðjufólks á Akureyri. Nýja félagið fékk nafnið Eining-Iðja og fagnar aldarfjórðungsafmæli í dag. Þetta sameinaða félag á sér ef til vill ekki langa sögu í stóra samhenginu, en byggir á gömlun grunni því félögin eiga sér hvort um sig langa og merka sögu í baráttu verkafólks fyrir réttindum sínum. Iðja á sér rætur aftur til 1936 og Eining til 1963, en þó eiginlega til 1894 í gegnum forvera þess félags. 

Sameiningin er rifjuðu upp í stuttu máli á vef Einingar-Iðju, en þar stendur meðal annars:

Sögu Iðju má rekja allt aftur til ársins 1936 og er stofndagur félagsins talinn 29. mars það ár. Verkalýðsfélagið Eining varð til 10. febrúar 1963 með sameiningu Verkakvennafélagsins Einingar og Verkamannafélags Akureyrarkaupstaðar. Rætur Einingar ná þó mun lengra aftur og má segja að fyrsta fræinu hafi verið sáð árið 1894 þegar Verkamannafélag Akureyrarkaupstaðar, hið eldra, var stofnað.

Fjölmenni var á stofnfundinum sem fram fór á Hótel KEA þar sem nýr formaður sagði m.a. að hann hefði miklar væntingar til hins nýja afls í eyfirskri verkalýðsbaráttu sem nú væri orðin til. „Þessar breytingar sýna hversu dugleg verkalýðshreyfingin er að laga sig að breyttum tímum og þjóðfélagsaðstæðum. Eyfirskt verkafólk ríður eins og oft áður á vaðið í þessum efnum. Það er tilbúið að takast á við nýja tíma á nýrri öld þar sem verkalýðshreyfingin ætlar sér áfram að vera öflugt þjóðfélagsafl, aflvaki framfara og breytinga til batnaðar.“