Bleika slaufan og ljóðalestur í hádeginu

Sigga Soffía, eins og hún kallar sig, er kunnur danshöfundur en hugsanlega þekktust fyrir flugeldasýningar og blómlistaverk. Hún hannar undir nafninu Eldblóm.

 

 

 

 

Bleika slaufan í ár er þrjú eldblóm sem mynda skínandi blómakrans sem lítur út fyrir að hafa verið dýft ofan í fljótandi málm, segir á vef Krabbameinsfélagsins. Þar segir einnig: „Allt tekur enda – ekkert er varanlegt“. Augnablikið þegar blómin springa út er ákveðinn hápunktur en mörgu þarf að huga að til að plantan blómstri. Að jafna sig eftir veikindi er svipað – og því meira sem við hlúum að fólkinu okkar eftir meðferð – því líklegra er að það blómstri aftur. Aðstandendur, ókunnugir sem bjóða góðan daginn, þeir sem að styðja við, peppa og segja þér að gefast ekki upp og trúa á þig hafa meiri áhrif en margan grunar.

 

Sigga Soffía er fjölhæfur listamaður „og líkt og klifurplantan sem teygir anga sína víða teygir hönnun hennar sig allt frá dansi yfir í vöruhönnun með anga yfir í mat, flugeldasýningar, ljóðlist og nú skartgripi,“ segir á vef Krabbameinsfélags Akureyrar og nágrennis.

 

Verkefnið hefur persónulega þýðingu fyrir Siggu Soffíu, segir á vef KAON; hún greindist með brjóstakrabbamein árið 2020 og þurfti að fara í lyfja- og geislameðferð og aðgerð, „og hefur því miklar og sterkar tilfinningar tengdar þessu verkefni,“ segir þar.

„Ég þekki af eigin raun hversu mikilvægt það er að hafa baklandið og félag eins og Krabbameinsfélagið til styðja við mann í ferlinu öllu og ekki síður eftir að meðferð lýkur. Félagið gaf mér leiðarvísi í þeim nýja veruleika sem ég þurfti að fást við. Mér fannst mér bera skylda til að bera þennan boðskap áfram og þakka fyrir þann mikilvæga stuðning sem ég hef fengið,“ segir Sigga Soffía á vef KAON.