Mikill viðsnúningur til hins verra varð á rekstri Kjarnafæðis Norðlenska á síðasta ári. Þá varð 250 milljóna króna tap á rekstri þessa stærsta kjötvinnslufyrirtækis landsins eftir skatta en árið áður var hagnaðurinn fyrir skatta 385,5 milljónir og 231,5 milljónir árið 2022.

Eftir skatta varð tapið 180 milljónir króna. Skatturinn reiknast sem sagt sem jákvæð tala vegna skattareglna.

„Stærstu áhrifaþættir versnandi afkomu eru miklar kostnaðarhækkanir á aðföngum, launum og þjónustu,“ segir í tilkynningu á vef fyrirtækisins. „Félagið tók þátt í viðleitni atvinnulífsins til að ná tökum á verðbólgu á Íslandi og hækkaði verð á sínum framleiðsluvörum að meðaltali minna en almenn verðlagsþróun og kostnaðarhækkanir gáfu tilefni til. Þá voru vaxtagjöld á árinu um 512 [milljónir króna], sem er 47 [milljónum] aukning frá árinu áður. Veldur þar hærra vaxtastig og hærri staða afurðalána vegna verðhækkana til bænda.“

Forsendur breyttust

„Forsenda þess að talið var unnt að stilla verðbreytingum mjög í hóf á sama tíma og afurðaverð til sauðfjárbænda í sláturtíð 2024 hækkaði um 12% samanborið við fyrra ár, voru áætlanir um hagræðingu sem breytingar á búvörulögum frá því í apríl 2024 gerðu mögulega. Tekin var ákvörðun um að greiða hluta væntrar hagræðingar út til neytenda og bænda fyrirfram, en ætlunin var að hefja hagræðingaraðgerðir í lok árs 2024. Í kjölfar dóms Héraðsdóms Reykjavíkur í nóvember 2024 og tilmæla Samkeppniseftirlitsins stöðvuðust allar stærri hagræðingaraðgerðir með tilheyrandi tjóni fyrir félagið.“

Sú óvissa sem skapast hefur um heimildir til hagræðingar hefur haft veruleg truflandi áhrif á rekstur félagsins, segir á vef Kjarnafæðis Norðlenska, „og ljóst að ef ekki verður unnt að hagræða verulega í rekstri, umfram það sem þegar hefur verið gert, mun það hafa neikvæð áhrif á getu félagsins til að halda aftur af verðhækkunum og draga úr greiðslugetu þess til bænda.“