Himinlifandi með fyrstu sumar- og bjórhátíðina

Mörg hundruð manns lögðu leið sína í Lystigarðinn í gær í prýðilegu veðri þegar haldin var Sumar- og bjórhátíð LYST.

Reynir Gretarsson, eigandi veitingastaðarins LYST, var himinlifandi með hvernig til tókst því hann renndi nokkuð blint í sjóinn að eigin sögn.  Markmið Reynis er að fá meira líf í garðinn; að sem flestir njóti þess að vera í því listaverki sem Lystigarðurinn er, eins og hann orðar það svo skemmtilega. Miðað við aðsóknina í gær má gera ráð fyrir að hátíð af þessu tagi muni festa sig í sessi á þessum fallega stað.

Brugghús víða af landinu voru með framleiðslu sína á hátíðinni þannig að hægt var að smakka margskonar öl. Einnig var hægt að njóta matar auk þess sem tónlist var í hávegum höfð, bæði yfir daginn og í gærkvöldi.

Sumar- og bjórhátíð LYST á laugardag