Bangsar mikilvægir í sjúkrabílnum

Slökkviliðinu á Akureyri bárust góðar gjafir á dögunum þegar handlagið prjónafólk í Félagi eldri borgara færði því tugi bangsa. Annars vegar hópur í félagsmiðstöðinni Birtu í Bugðusíðu, hins vegar þeir sem koma saman í félagsmiðstöðinni Sölku í Víðilundi.

„Bangsarnir gegna því mikilvæga hlutverki að aðstoða okkur við að börnum líði betur þegar þau „lenda“ í því að fá ferð með sjúkrabíl,“ sagði á Facebook síðu slökkviliðsins, þar sem gefendum voru færðar innilegar þakkir. „Við þökkum innilega fyrir þessa æðislegu gjöf og verður ánægjulegt að veita þessum böngsum nýtt heimili“