Mjög mikilvægur leikur Þórs/KA á heimavelli

Þór/KA tekur á móti Aftureldingu í dag á Þórsvellinum (SaltPay vellinum) í Bestu deildinni, efstu deild Íslandsmótsins í knattspyrnu. Þetta er fyrsti heimaleikur Stelpnanna okkar að loknu löngu hléi vegna EM í Englandi. Fyrsti leikur þeirra eftir EM var á útivelli gegn Val á fimmtudaginn var.

Mótherji dagsins er í neðsta sæti Bestu deildarinnar með sex stig eftir 11 leiki, KR er næst neðst með sjö stig eftir 12 leiki og Þór/KA er í þriðja neðsta sæti með 10 stig að loknum 11 leikjum.

Flautað verður til þessarar mikilvægu viðureignar klukkan 17.30; Þór/KA verður hreinlega að sigra til þess að mjaka sér örlítið frá neðstu liðunum og ástæða er til þess að hvetja fótboltaáhugamenn til þess að fjölmenna og sýna stelpunum stuðning í verki.

Þór/KA vann fyrri leik liðanna í sumar í Mosfellsbæ. Sandra María Jessen kom Þór/KA yfir með marki eftir aðeins 17 sekúndur, Afturelding jafnaði fyrir hlé en Arna Eiríksdóttir gerði sigurmarkið þegar langt var liðið á leikinn.