Handboltinn: KA/Þór - ÍBV og Selfoss - KA
Íslandsmótið í handbolta hófst í vikunni og Akureyringar hefja leik í dag í efstu deild, Olís deildinni; kvennalið KA/Þórs tekur á móti ÍBV í KA-heimilinu klukkan 13.00 og karlalið KA sækir Selfoss heim. Leikurinn á Selfossi hefst klukkan 16.00.
Nýir þjálfarar eru í brúnni hjá báðum liðum. Arna Valgerður Erlingsdóttir er aðalþjálfari KA/Þórs og Þorvaldur Þorvaldsson aðstoðarþjálfari. Nýr þjálfari KA er Halldór Stefán Haraldsson.
Markvörðurinn Nicolai Kristensen sem kom til KA í sumar frá Noregi, Ott Varik hornamaður frá Eistlandi og Halldór Stefán Haraldsson sem ráðinn var þjálfari í sumar. Ljósmynd: Egill Bjarni Friðjónsson
Töluverðar breytingar verða á liði KA/Þórs í vetur frá síðasta tímabili. Fyrir það fyrsta eru tveir lykilmenn, Rut Jónsdóttir og Unnur Ómarsdóttir, í fæðingarorlofi og þá fór Daninn Ida Hoberg HSG Blomberg-Lippe í Þýskalandi. Hildur Lilja Jónsdóttir gekk til liðs við Aftureldingu, Anna Marý Jónsdóttir fór til Danmerkur, Ólöf Marín Hlynsdóttir til Aftureldingar og Sunna Katrín Hreinsdóttir í Víking
Rakel Sara Elvarsdóttir er hins vegar komin heim á ný eftir ársdvöl í Noregi.
Breytingar hafa einnig orðið á KA-liðinu. Markvörðurinn Nicholas Satchwell er farinn til Viking TIF í Noregi, Dagur Gautason til ØIF Arendal, einnig í Noregi, Allan Norðberg gekk til liðs við Val og Gauti Gunnarsson sneri aftur til ÍBV.
KA-menn sömdu í staðinn við markvörðinn Nicolai Horntvedt Kristensen, sem kom frá Nøtterøy í Noregi, og hornamanninn Ott Varik frá FC Viljandi í Eistlandi. Þá samdi KA áfram við fjölda ungra, uppaldra KA-manna.
Stelpurnar í KA/Þór leika á heimavelli í dag gegn ÍBV. Myndin er tekin á kynningarkvöldi KA/Þórs og KA í vikunni. Ljósmynd: Egill Bjarni Friðjónsson
Spáin
Akureyrarliðunum var ekki séð spáð sérstöku gengi í árlegum samkvæmisleik, spá fyrirliða, þjálfara og forráðamanna liðanna sem opinberuð var á kynningarfundi deildarinnar í vikunni.
Spáin er þessi fyrir Olís deild karla:
1. FH - 391 stig
2. Valur - 347 stig
3. Afturelding - 335 stig
4. ÍBV - 325 stig
5. Haukar - 267 stig
6. Fram - 254 stig
7. Stjarnan - 201 stig
8. Selfoss - 176 stig
9. KA - 167 stig
10. Grótta - 121 stig
11. HK - 116 stig
12. Víkingur - 77 stig
Spáin fyrir Olís deild kvenna lítur svona út:
1. Valur - 167 stig
2. Haukar - 139 stig
3. ÍBV - 137 stig
4. Fram - 121 stig
5.Stjarnan - 91 stig
6. KA/Þór - 80 stig
7. Afturelding - 54 stig
8. ÍR - 51 stig
Allir leikir sýndir beint
Stórtækar breytingar verða í sjónvarps- og útbreiðslumálum hjá Handknattleikssambandi Íslands fyrir komandi keppnistímabil, að því er segir í tilkynningu frá sambandi.
Á heimasíðu sambandsins segir að HSÍ muni boða til „umbyltingar varðandi upptökur og útsendingar frá deildarkeppnum í íslenskum handknattleik í nánustu framtíð þar sem nýjasta, stafræna tækni verður nýtt til hins ýtrasta í nánu samstarfi við fjölda bakhjarla og samstarfsaðila.“
Síminn mun taka að sér að setja upp sérstaka handbolta-/áskriftarrás þar sem allir leikir í efstu deildum og einstök mót yngri flokka verða sýndir í beinni útsendingu. Síminn mun ennfremur sýna í hverri viku að minnsta kosti einn leik úr efstu deildum í opinni dagskrá í Sjónvarpi Símans ásamt því að veita margvíslega þjónustu. Hægt er að panta áskrift að Handboltapassanum hér.
Nánar hér á heimasíðu HSÍ
