Helga Steinunn fagnar 100 ára afmæli

Helga Steinunn Jónsdóttir frá Hrísey fagnar 100 ára afmæli sínu í dag. Hún býr á Dalbæ á Dalvík en hefur enn lögheimili í Hrísey og er því íbúi Akureyrar. Ásthildur Sturludóttir, bæjarstjóri, heimsótti Helgu í morgun og færði henni blómvönd frá bæjarstjórn Akureyrar í tilefni dagsins. „Fór vel á með þeim stöllum og hafði Helga frá ýmsu að segja, enda er hún mjög ern, hress og kát þótt heyrnin sé aðeins farin að gefa sig,“ segir í frétt á heimasíðu Akureyrarbæjar.

Þar segir ennfremur um Helgu: „Hún fæddist á Kálfsskinni á Árskógsströnd 2. febrúar 1921. Foreldrar hennar áttu sex börn, þar af tvenna tvíbura. Bergrós tvíburasystir Helgu varð 93 ára og hálfbróðir Helgu samfeðra er Sveinn á Kálfsskinni sem er Akureyringum að góðu kunnur.

Helga kynntist verðandi eiginmanni sínum Jóhanni Ásgrími Ásmundssyni á Árskógssandi en árið 1965 fluttu þau til Hríseyjar og bjuggu þar í Syðstabæ. Þeim varð þriggja barna auðið en Jóhann lést árið 1970. Helga bjó þá áfram í Syðstabæ með dóttur sinni og 5 börnum hennar allt þar til hún fluttist á dvalarheimilið Dalbæ fyrir fáeinum árum. Helga sinnti ýmsum störfum í gegnum tíðina og vann meðal annars í frystihúsinu í Hrísey en einnig þótti hún mjög liðtæk saumakona og aðstoðaði gjarnan konur sem voru að sauma upphlut eða annað sem tengdist þjóðbúningasaumi.“